Jilata Roberto Fernández Erquicia

Khä 1983 maranakana, Instituto Nacional de estudios Lingüísticos (INEL) ukana irnaqasipxayätha. Ukaru purt’asinkiri mä wiraxucha waynuchuxa, wali jiwaki parliri ukhamara wali jiwaki sawkasiri, ukhamänawa. Kunsa laruñjamaki parliri. Juparuxa tata Witaku Wankasa, Juwaniku Carvajalasa uñt’awayapxiwa. Qhipha maranakaxa, jupaxa jiwatjamawa chaqhawayxi. Janiwa sarxäwa, janiwa jutxkäti sawäpxkitusa, ukhamakiwa chhaqhawayxi. Nayaxa juparu phutu apsurïtha. Ukhamata jupana mä phutupaxa utjitu.

Jichha urunakaxa, khaya facebook uksatuqiwa, wasitata uñt’asxapxtha. Jupaxa París markana qaamaskatayna. Uksana mä murinu tamawa thuqhuntatayna, uka phutunaka apayanitu. Ukata nayaaxa juparu qillqtha: “mä yatiyawi uka markana murinu thuqhutapata qillqt’anirapita”, sasina.  Jupaxa wali q’aphapiniwa kastilla aruta qillqt’anisa apayanitu, ukxa jichhaxa aka Jayma yatiyawina uñxatt’aañamataki apst’asinkapxtha.

Jupjama jilanakasaxa, kawki markasata jayankkasasa, markasana ch’amanchasiñpataki qillqt’anixa, wali askipuniwa. Inacha mayni yaqha jilatanakaxa, Roberto juparu uñtasa qillqt’anipxistaspa, wali kusapunispawa. Jallalla jilata Roberto. Jumaxa aymara markana wawapäskaraktawa.